Fryske Krite Bûtenpost Hûs
Bêste toanielfreonen,
Oars as oars
De tradysje wol dat yn elts winterskoft it Kritetoaniel fan Bûtenpost twaris, yn novimber en maart, in stik oer it fuotljocht bringt. dit winterskoft is dat lykwols krekt efkes oars as oars. Nei "Brutsen iis" yn novimber komt der yn maart gjin stik fan de eigen betroude minksen. Om ferskate redenen, stúdzje, wurk en oare wichtige besonjes is it warbere toanielselskip der net yn slagge in twadde stik te besetten; tige spitich mar it is net oars.
Dochs is der foar jimme, wiere leafhawwers út Bûtenpost en omkriten, op sneontejûn 6 maart de nedige treast te finen yn sealensintrum The Point. En dat is net samar wat sljochtweihinne treast, nee treast mei sûker en molke. Us toanielfreonnen fan Beetstersweach, Kritetoaniel De Sweach, komme manmachtich nei Bûtenpost om in prachtige stik "Treast mei sûker en molke" te spyljen.
Dizze klucht fan de ferneamde Fryske skriuwster Froukje Annema is al mei in soad súkses yn ús provinsje spile, en dat sil op 6 maart grif net oars wêze. Mei oare wurden: in kritejûn mei oare spilers mar foar it fierdere sil alles itselde wêze, it folksliet, de ferlotting, dûnsje nei ôfrin en noflik der ien op nimme mei freonnen en oare kunde. Dus gewoan allegearre wer komme want jo witte it: Kritejûnen binne noflike jûnen.
Nijsgjirrich wurden ..... gewoan komme,
Alfêst in tige noflike jûn tawinske,
bestjoer Fryske Krite Bûtenpost.
Sa as jim sjen kinne is der in soad te sjen en te lêzen op dizze side. Wy sille besykje om de side sa goed mooglik by te hâlden mar as jimme oanfollings hawwe dan hearre en sjogge wy it graach. Under it kopke reaksjes kinne jimme fan alles kwyt; reaksjes oer de stikken, oer de side of oer oare saken dy't jimme kwyt wolle. Stadichoan sil der mear op de side komme dus jim kinne sa no en dan wêr efkes op de side sjen en dan sille jim wêr neie dingen ûntdekke. Sa besykje wy ek âlde saken te finen dy't wy graach yn de Alde Doaze sette wolle. Mei oare wurden, as jimme aardige âlde foto's, ferhalen of anekdoates witte, dan sjogge wy dy graach ferskinen en wy sette se op ús eigen website.
Wy hoopje dat jimme in soad wille oan dizze side belibje sille.
Groetnis,
It bestjoer
